Kaixo, nire izena Sabin da. Txakur-zaleagoa nintzen 2004.urtean ustekabean katakume kumezurtz bat zakarrontzitik jaso nuen arte, Eki. Txakur jarrera garatu zuen eta horrekin katuen mundu ezezagunarekiko jakin-mina piztu zidan. Dauden 40 bat katu arrazen jarreran ere ezberdintasun nabarmenak daudela ikasi nuen, eta abisiniar katuen felido basati itxura ederrak eta jarrera oso aktiboak liluratu ninduten. Ekirekin ere katuak trebatu daitezkeela ikasi nuen. Katuek txunditu egin ninduten, eta inoiz katurik hazteko asmorik izango banu abisiniar katuak nire aukera izango zirela argi geratu zitzaidan. Eskerrik asko, Eki, nire bizitzan agertu zinelako! Goian bego. Hona hemen bere argazki bi: zakarrontzitik hartu eta bainatu berritan bata, eta nagusitan bestea.

2010.urtean abisiniarrak hazi nahi nituela erabaki nuen eta, Eki alboan nuela, nire lehen abisiniar katu ugaltzailearen bila hasi nintzen. Bidai luzea izan zen, egitasmo bat hasi aurretik, gogoko dudalako informazioa sakon, serio eta erantzukizunarekin aztertzea, eta gainera, estatu espainiarrean ez dago abisiniar hazle askorik, eta Europako hoberenetakoa ekarri nahi nuen gure Europako bazter txiki honetako Euskal Herrira. Bidean Loturak eta Bibliografia atalean gomendutako liburu guztiak irakurri nituen eta FIFe, munduko katu erakunde handiena, ezagutu nuen, eta harekin ASFE (estatu espainiarrean bere ordezkaritza duen katu erakundea). Erakunde hauen jardunaldi eta erakusketei esker, 2012.urtean Europa osoan ospatuko zen Abisiniarren arraza-erakusketa berezi bakarrera joatea erabaki nuen, Danimarkako Fredericia herrira. 21 hazle ezberdinetako 69 abisiniar aurkeztu ziren! Bertan Faby-Cats* katutegiko Mette eta Søren ezagutu nituen, eta gutxira eme bat eskaini zidaten nire katutegiari hasiera emateko: erbi koloreko "Lehena". Ia jarraian urdin koloreko Jina ere gehitu zen, eta pare bat urte geroago harrak.

Etxe giroko katutegiak ez dira etekintsuak, galerak besterik ez dituzte, beraz, hau zaletasun bat besterik ez da. Ogibidez Zientzia Masterdun Herri Ingeniari bezala jardun dut eta, 2019ko bukaeraz geroztik, Psikologia graduko ikaslea naiz unibertsitatean. Bilbon bizi naiz nire abisiniar guztiekin, nire familiako zati bailira.

Webgune honetan pluralean ari gara, izan ere, nire familia osoaren laguntza eta babesa beharrezkoak baitira ABILKI etxe haztegi katutegia egi bihurtzeko. Beraien laguntza eta bisitak etengabeak dira, guztion artean osatzen dugu ABILKI familia.

Beheko harremanetarako datuak erabili zalantzarik argitzea beharko bazenu. Pozik erantzungo dizut, ahal dudan ongien.